На БМЗ прыгразілі звальненнямі тым, хто "свядома падрывае аўтарытэт" завода
Андрэй Кулакоўскі / БМЗ
Крызіс на Беларускім металургічным заводзе ў Жлобіне тлумачыцца "няпростай сітуацыяй у свеце". Пра гэта работнікам прадпрыемства заявіў галоўны ідэолаг БМЗ, намеснік гендырэктара Андрэй Кулакоўскі, піша "Флагшток".
"Сёння мы працуем з колаў і ва ўмовах строгай эканоміі. Наступіў перыяд, калі нам трэба цалкам пераасэнсоўваць сваю працу. Працаваць "як-небудзь" сёння не атрымаецца", — заклікаў ён работнікаў завода.
Кулакоўскі паабяцаў, што сацыяльныя праграмы застануцца ў сіле — за выключэннем будаўніцтва жылля, якое па-ранейшаму замарожанае.
Потым ён заявіў, нібыта супраць БМЗ "сёння ідзе інфармацыйная вайна", таму трэба сачыць за сваімі выказваннямі ў інтэрнэце. Таксама Кулакоўскі прыгразіў звальненнямі тым, хто "ў такі час свядома падрывае аўтарытэт БМЗ".
"У кожнага з вас ёсць падпісаны вамі ж кантракт, ёсць правілы ўнутранага працоўнага распарадку, ёсць Закон аб абароне персанальных даных", — заявіў ён.
Напярэдадні іншы намеснік гендырэктара БМЗ Уладзімір Чавус заявіў, што галоўная задача прадпрыемства сёння — эканомія выдаткаў. Таксама ён паведаміў, што завод актыўна шукае новыя рынкі для сваёй прадукцыі.
