У Беларусі ствараецца музычны фан-клуб “Будзьма свабоднымі!”

Фан-клуб беларускай музыкі атрымаў назву "Будзьма свабоднымі!". Ён ствараецца Беларускай Музычнай Альтэрнатывай у рамках кампаніі “Будзьма!”.  Па словах музычнага прадзюсара Віталя Супрановіча, фан-клуб ствараецца з аматараў беларускай музыкі. Яго мэта  — далейшая папулярызацыя беларускай музыкі.

Супрановіч: Мы маем зараз вялікую колькасць падпісчыкаў на нашыя дыскі "Песні Свабоды", "Не заганяйся". Гэта людзі, якія жадаюць не толькі атрымліваць гэтыя дыскі, але і нечым займацца. Улічваючы ўсё гэта, мы вырашылі стварыць пакуль больш віртуальны фан-клуб. Але ў далейшым, магчыма, будуць праводзіцца паседжанні гэтага фан-клуба.

Таксама фан-клуб будзе займацца выданнем дыскаў. Зараз выйшаў музычна-інфармацыйны дыск “Фестывальны рух Беларусі”, прысвечаны музычным фэстам, якія адбываліся і адбываюцца ў Беларусі. Сярод удзельнікаў фан-клуба дыск будзе распаўсюджвацца бясплатна.

Па словах В.Супрановіча, далучыцца да фан-клуба можна праз электронную пошту ([email protected]), даслаўшы свае кантакты. Навіны пра дзейнасць клуба будуць таксама з'яўляцца на сайце www.belmusic.org.