У Брэсце міліцыя затрымала кіраўнікоў прадпрымальнікаў

Брэсцкая міліцыя не ведае, што рабіць з затрыманымі актывістамі рэспубліканскага грамадскага аб'яднання прадпрымальнікаў "Перспектыва". Старшыня арганізацыі Анатоль Шумчанка, яго намеснікі Віктар Чайкоўскі і Вольга Круміна былі затрыманыя зранку 5 траўня, калі выходзілі з машыны. Актывісты "Перспектывы", як інфармуе БелаПАН, прыехалі ў Брэст, каб уручыць дэпутатам абласнога савета зварот уладальнікаў кіёскаў. Прадпрымальнікі патрабуюць адмяніць рашэнне аблвыканкама, згодна з якім забаронена прадаваць піва і слабаалкагольныя напоі ў дробнарознічнай сетцы.

Міліцыянты заявілі Шумчанку, што ён падобны да чалавека, абвешчанага ў вышук. Затрыманых даставілі ў міліцэйскі пастарунак, праверылі дакументы і ўзялі тлумачэнні наконт іх знаходжання ў Брэсце.

Па словах Шумчанкі, міліцыянты папросту не ведаюць, што рабіць з затрыманымі. Іх ужо збіраліся адпускаць, але ўбачылі групу рэпарцёраў каля аддзела міліцыі і прапанавалі неўпрыкмет з'ехаць з горада на сваёй машыне. Кіраўніцтва "Перспектывы" адмовілася ад таемных уцёкаў.