Іранскую студэнтку, якую затрымалі ў Мінску за каментары пра Іран, дэпартавалі з Беларусі
Хатэрэ Хадададзі і пашпарт з забаронай на ўезд у Беларусь / Калаж Еўрарадыё
Іранскую студэнтку, якую затрымалі ў Мінску за каментары пра Іран, дэпартавалі з Беларусі. Але не на радзіму, а ў Арменію. Ёй на 30 гадоў — да канца красавіка 2056 года — забаранілі ўезд у нашую краіну, расказала Еўрарадыё Хатэрэ Хадададзі.
Дзяўчына вучылася ў Беларусі на стаматолага. У красавіку яе затрымалі за каментары пра Іран у тэлеграме.
Спярша яе пакаралі 14-цю суткамі арышту, але па сканчэнні тэрміну не вызвалілі, а дэпартавалі. Дарэчы, Хадададзі адмаўляе, што пакуль яна знаходзілася ў ІЧУ, туды прыязджалі прапагандысты і здымалі пра яе сюжэт. Ды і па беларускім тэлебачанні нічога такога не паказвалі.
