Гомельскі падлетак застрэліўся з рэвальвера, які маці падарыў знаёмы

Некалькі тыдняў таму ў Гомелі з рэвальвера застрэліўся падлетак. Цяпер сталі вядомыя падрабязнасці гэтай гісторыі, піша newsgomel.by.

Раней судзімы жыхар Гомеля зрабіў падарунак сваёй знаёмай. Ён уручыў ёй рэвальвер, які незаконна набыў у 2022 годзе. Зброя была пераробленая пад баявую з сігнальнага "Нагана".

Небяспечны падарунак жанчына прынесла дадому, а там пра зброю даведаўся яе сын. Што адбылося ў хлопчыка, не паведамляецца, але падлетак застрэліўся.

Пасля яго гібелі пачалося разбіральніцтва, падчас якога высветлілася, адкуль у доме ўзяўся рэвальвер.

Да гомельца прыйшлі з ператрусам. У яго кватэры міліцыянты выявілі сумесь бяздымнага і дымнага пораху масай не менш за 44 г, а таксама 143 патроны, прыдатных для стральбы з ручной наразной агнястрэльнай зброі.

На мужчыну пачалі крымінальную справу і ўзялі яго пад варту.