У Рэчыцы знайшлі нелегальны дом састарэлых
Пенсіянерка, ілюстрацыйнае фота
Нелегальны дом састарэлых у Рэчыцы Гомельскай вобласці выявіў Камітэт дзяржкантролю.
На догляд састарэлых у стацыянары ў кастрычніку 2024 года ўвялі прымусовае абавязковае ліцэнзаванне. Так улады ўзялі гэтую сферу пад дзяржаўны кантроль. Дом састарэлых у Рэчыцы такой ліцэнзіі не меў.
"Разам з тым асобныя грамадзяне грэбуюць такімі патрабаваннямі і з мэтай асабістага ўзбагачэння арганізоўваюць нелегальныя "дамы састарэлых" у сябе дома. Падобны факт выяўлены органамі фінансавых расследаванняў у Гомельскай вобласці", — абураюцца ў КДК.
Там сцвярджаюць, што жыхарка Рэчыцы два гады ў сваім доме аказвала паслугі больш як дзесяці пажылым людзям. За гэтыя паслугі ёй плацілі сваякі састарэлых, а таксама яна здымала пенсіі з картак сваіх "пастаяльцаў".
У Дзяржкантролі налічылі "незаконна атрыманы даход" у суме больш за 135 тысяч рублёў. На жанчыну пачалі крымінальную справу за прадпрымальніцкую дзейнасць без ліцэнзіі.
