Стала вядома, як БелАЗ абыходзіць міжнародныя санкцыі

Для абыходу міжнародных санкцыяў БелАЗ выкарыстоўвае дзве схемы і некаторыя замежныя фірмы. Гэта вынікае з дакументаў, якія сталі даступныя арганізацыі былых сілавікоў BELPOL.

Пасля таго, як Еўрасаюз забараніў імпарт кар'ерных самазвалаў, беларускае прадпрыемства стала займацца пастаўкамі разукамплектаваных камплектаў дэталяў. Пастаўляюцца дзясяткі пазіцый: рамы, платформы, кабіны, масты, колы, гідраўлічныя вузлы, сілавыя агрэгаты ды іншыя камплектуючыя. Усё разам дазваляе сабраць паўнавартасны кар'ерны самазвал. Атрымліваецца, што змяняецца не сама прадукцыя, а форма яе пастаўкі.

Пастаўшчыкамі выступаюць сінгапурская кампанія FINMINING LTD. і ААТ "ГЗПР" (Гомельскі завод пускавых рухавікоў). Схема пастаўкі, як гаворыцца ў дакуменце, прадугледжваецца "Стратэгіяй продажаў і развіцця тавараправоднай сеткі БелАЗ" на 2026 год, якую зацвердзіла Міністэрства прамысловасці. З увагі на санкцыі пасярэднікам прызначаюць спецыяльныя цэнавыя ўмовы, каб кампенсаваць дадатковыя выдаткі, звязаныя з лагістыкай, афармленнем дакументаў і фінансавымі аперацыямі.

Другая схема працуе для паставак у Чылі. Ключавую ролю ў ёй таксама адыгрывае сінгапурская кампанія FINMINING LTD. Як уладальніца дзесяці кар'ерных самазвалаў фірма перадае іх у арэнду чылійскім прадпрыемствам і пачынае атрымліваць пастаянны прыбытак. Паводле ацэнкі БелАЗа, гэта прыносіць каля 100 тысяч долараў прыбытку штомесяц.

Атрыманыя сродкі пералічваюцца ў БелАЗ не наўпрост, а ідуць ускоснымі плацежнымі маршрутамі. Акрамя таго, FINMINING канвертуе еўра ў расійскія рублі "паводле пэўных схемаў", што займае да двух месяцаў.

Крыніцай экспартнага фінанасавання з'яўляецца ААТ "Банк развіцця Рэспублікі Беларусь". Мяркуецца, што крэдыты гэтага банка дазволяць FINMINING выканаць абавязацельствы перад БелАЗ, а потым пагашэнне крэдыту будзе адбывацца за кошт даходаў ад здачы ў арэнду тэхнікі ў Чылі.