Да адпраўкі ў войска "нядобрасумленных работнікаў" далучаць ваенных камісараў
Міністр абароны Віктар Хрэнін / БЕЛТА
Да адпраўкі ў войска "нядобрасумленных і недысцыплінаваных работнікаў уборачнай" далучаць ваенных камісараў. Пра гэта заявіў міністр абароны Віктар Хрэнін.
Напярэдадні Лукашэнка загадаў адпраўляць у войска тых, хто не ўмее працаваць на ўборачнай, а таксама чыноўнікаў, якія не выконваюць даручэнні. Ён заявіў, што іх трэба накіроўваць на мяжу з Украінай і трэніраваць з сіламі спецаперацый, размешчанымі там.
"Я далажыў, як будзе выконвацца даручэнне кіраўніка дзяржавы. Да гэтай працы цяпер будуць далучаныя ваенкамы, якія бліжэйшым часам правядуць сумесныя нарады з кіраўнікамі мясцовых органаў улады на месцах і вызначацца з паслядоўнасцю", — расказаў журналістам Хрэнін пасля дакладу Лукашэнку.
Міністр дадаў, што ў войска будуць браць не дзеля перавыхавання: "Будзем браць для таго, каб удасканальваць баявую вывучку нашых людзей, асабліва ваеннаабавязаных".
