Беларусь, імаверна, адмаўляецца ад дыверсіфікацыі пастаўшчыкоў энергіі — даклад iSANS

У Беларусі прынялі новую рэдакцыю Канцэпцыі энергетычнай бяспекі. Аналітыкі iSANS лічаць, што Беларусь, імаверна, адмаўляецца ад дыверсіфікацыі пастаўшчыкоў, хоць крытычна залежыць ад імпарту энергіі.

З новай Канцэпцыі стала зразумела, што доля аднаўляльнай энергетыкі да 2040 года запланаваная на ўзроўні 8,5% — хоць у 2022 годзе яна ўжо была 8,3%, а энергетычная самастойнасць за 15 гадоў павінна вырасці ўсяго на 1,9%.

Залежнасць ад газу планавалі знізіць да 50% да 2035 года — цяпер мэта 65% да 2040-га. Інвестыцыі ў энергетыку скарацілі амаль удвая — з 6,5% да 3,8%.

Пры гэтым у новай Канцэпцыі ў індыкатарах не адлюстраваны трэці блок АЭС.

Сярод пагроз і рызык размыта праблема спынення паставак энергрэсурсаў. Хоць пасля 2015 года такая небяспека як мінімум аднойчы стала рэальнай і пагражала Беларусі паўнавартасным энергетычным крызісам.

Раздзел пра дыверсіфікацыю пастаўшчыкоў выдалілі ўвогуле, разам з ім зніклі важныя для Беларусі задачы, як пошук альтэрнатыўных пастаўшчыкоў энергрэсурсаў.

Калі раней прыярытэтам у Беларусі былі аднаўляльныя крыніцы энергіі (АКЭ), то цяпер — торф, і толькі потым АКЭ. Мінэнерга відавочна робіць стаўку на тарфяную прамысловасць — насуперак сусветным тэндэнцыям і экалагічным пагрозам, лічаць у iSANS.

Аналітыкі лічаць, што такія дакументы, як Канцэпцыя, павінны прымацца ў выглядзе закона — каб урад быў абавязаны выконваць пастаўленыя задачы. Але ў рэальнасці Канцэпцыю прымае Савет Міністраў, а распрацоўвае, відаць, само Мінэнерга.

У выніку большасць задач да 2040 года ўжо выкананыя сёння, а ключавыя тэмы проста адсутнічаюць.