Кіраўнік МУС пракаментаваў канфлікт пасажыркі таксі з кіроўцам-замежнікам

Міністр унутраных спраў Беларусі Іван Кубракоў пракаментаваў нашумелы канфлікт паміж пасажыркай таксі і кіроўцам-замежнікам у Мінску. Ён заклікаў не рабіць паспешных высноў.

Напярэдадні ў сацсетках вялікі розгалас набыла гісторыя дзяўчыны, якая расказала, што таксовец-замежнік яе ўдарыў па шчацэ, калі яна з сяброўкай папрасілі зрабіць музыку цішэй. Неўзабаве ў МУС паведамілі, што выявілі асобу кіроўцы.

Паводле Кубракова, гэта 30-гадовы замежны студэнт адной з беларускіх ВНУ, які падзарабляе падчас навучання. Міністр расказаў, што дзяўчаты падчас паездкі здымалі кіроўцу на тэлефон, нягледзячы на ягоныя неаднаразовыя просьбы спыніць здымкі. Той спрабаваў выбіць тэлефон і пры гэтым стукнуў пасажырку.

"Аказваецца, усю дарогу, пакуль яны ехалі, яны здымалі гэтага хлопца на мабільны тэлефон, рускую не зусім добра ведае. Ён папрасіў: прыбярыце тэлефон. Некалькі разоў папрасіў, але потым, відаць, не вытрымалі нервы. Ударыў рукой, хацеў выбіць тэлефон. У выніку яна напісала заяву", — паведаміў Кубракоў.

Пасля публікацыі відэа ў інтэрнэце з'явіліся заклікі дэпартаваць кіроўцу і прыцягнуць яго да адказнасці. Але кіраўнік МУС заклікаў высветліць усе акалічнасці: "У кожнай сітуацыі трэба разбірацца. Спатыкнуўся чалавек, калі ён усвядоміў, калі ён раскаяўся, дык трэба яму даць шанец. Ну, пракантраляваць яго далейшыя паводзіны".