Ва Украіне рыхтуюць закон, які павінен дапамагчы вырашыць праблему беларусаў з пашпартамі

Дзяржаўная міграцыйная служба Украіны распрацавала асобны законапраект, каб урэгуляваць дакументы беларусаў, якія не могуць атрымаць ці абмяняць пашпарты праз дзеянні рэжыму Лукашэнкі. Пра гэта гаворыцца ў афіцыйным адказе ўкраінскага МУС на зварот грамадскага аб'яднання "Беларуская супольнасць Украіны". Пра гэта ў Фэйсбуку расказаў кіраўнік аб'яднання Аляксей Францкевіч.

У адказе МУС гаворыцца, што беларусы, якім небяспечна вяртацца на радзіму, могуць звяртацца па абарону ў адпаведнасці з законам "Аб бежанцах і асобах, якія патрабуюць дадатковай або часовай абароны". Гэтыя звароты разглядаюцца індывідуальна.

Але Францкевіч звяртае ўвагу на наяўнасць асобнага законапраекта: "Важна, што МУС пацвердзіла: Дзяржаўнай міграцыйнай службай ужо распрацаваны асобны законапраект, які павінен урэгуляваць пытанне дакументавання замежнікаў і асоб без грамадзянства, у тым ліку грамадзян Беларусі, якія не маюць магчымасці атрымаць або абмяняць пашпартныя дакументы праз дзеянні рэжыму Лукашэнкі і адсутнасць магчымасці атрымаць пашпарт за межамі Беларусі".

Пры гэтым МУС не падтрымала іншы законапраект, у якім меркавалася выдаваць дакументы па гуманітарных падставах. Гэты механізм, палічылі ў ведамстве, можа прывесці да суб’ектыўнай ацэнкі дакументаў і не забяспечвае неабходнай прававой вызначанасці.

Францкевіч заклікае беларусаў, якія сутыкнуліся ва Украіне з праблемай пратэрмінаванага пашпарту ці адмовай у абмене дакументаў, паведамляць пра гэта ў іх арганізацыю: чым больш фактаў, тым мацнейшай будзе пазіцыя ў дыялогу з дзяржорганамі.