Польскія спецслужбы не каментуюць звесткі пра антытэрарыстычнае папярэджанне з Мінска

Спецслужбы Польшчы не каментуюць паведамленні пра антытэрарыстычнае папярэджанне, якое агучыла МЗС Беларусі.

"Не каментую паведамленні СМІ на гэтую тэму. Аднак я запэўніваю вас, што польскія службы ніколі не прымяншаюць ніякага трывожнага сігналу і да ўсёй інфармацыі пра магчымыя пагрозы падыходзяць з належнай сур'ёзнасцю", — заявіў прэс-сакратар міністра — каардынатара спецыяльных службаў Яцэк Дабжыньскі.

Паводле яго словаў, якія пераказвае выданне "Позірк", ніякія спецслужбы ў свеце ў такіх выпадках не раскрываюць свае дзеянні "на такім этапе".

Увечары 23 ліпеня МЗС Беларусі паведаміла, што папярэдзіла Польшчу пра падрыхтоўку тэракту на тэрыторыі гэтай краіны. Нібыта тэракт рыхтуе грамадзянін Беларусі, "нядаўна пазбаўлены польскімі ўладамі дадатковай абароны і права пражывання ў краіне". З гэтага можна меркаваць, што гаворка ідзе пра нейкага палітуцекача.

Мэтай тэракту, як сцвярджаюць беларускія дыпламаты, "павінны стаць непаўналетнія дзеці актывісткі, якая пражывае ў Польшчы, якая мае беларускае грамадзянства, з меркаванняў помсты за недастатковыя намаганні па захаванні за згаданай асобай названага вышэй статусу ў Польшчы".