Беларусцы пагражае сем гадоў за тое, што стукнула міліцыянта далонню па спіне

28-гадовай жыхарцы Дзяржынска пагражае сем гадоў пазбаўлення волі за тое, што яна стукнула міліцыянта далонню па спіне. Пра гэта выданню dzr.by расказаў намеснік начальніка Дзяржынскага РАУС па ідэалагічнай працы і кадравым забеспячэнні падпалкоўнік міліцыі Ігар Калоша.

Інцыдэнт адбыўся сёлета ў сакавіку. Нецвярозыя мужчына і жанчына былі каля аднаго з бараў горада. Міліцыянты, якія праходзілі міма, зрабілі ім вусную заўвагу і прапанавалі адправіцца дадому. Праз некалькі гадзін міліцыянты зноў заўважылі пару на гарадской вуліцы і вырашылі скласці адміністрацыйны пратакол.

Як кажуць у міліцыі, мужчына і жанчына адмаўляліся адказваць на пытанні, не называлі свае даныя. Міліцыянты вырашылі даць ім пяць дзён арышту. Пабачыўшы, як яе спадарожніка садзяць у службовы аўтамабіль, жанчына падышла да супрацоўніка і двойчы стукнула яго далонню па спіне. Як вынікае са словаў Ігара Калошы, міліцыянт гэтыя ўдары нават не адчуў.

"Прычым гэты факт быў выяўлены ўжо падчас разбору пры праглядзе відэарэгістратара. Па сутнасці, цялесных пашкоджанняў супрацоўніку міліцыі яна наогул ніякіх не прычыніла. Тым не менш у дачыненні да жанчыны распачалі крымінальную справу па факце гвалту ў дачыненні да супрацоўніка міліцыі", — паведаміў ён.

Таксама міліцыянт расказаў, што колькасць канфліктаў жыхароў з сілавікамі ў Дзяржынскім РАУС застаецца высокай. Ад пачатку года было складзена 36 пратаколаў за непадпарадкаванне супрацоўнікам міліцыі і 3 пратаколы за абразу прадстаўнікоў улады. І адна крымінальная справа на жанчыну, якая стукнула міліцыянта па плячы.