Антарктыда пабіла абсалютны зімовы тэмпературны рэкорд

У Антарктыдзе зафіксавана рэкордная для зімы тэмпература — 15,4°C. Паказчык быў зарэгістраваны 6 чэрвеня на аргентынскай даследчай станцыі Эсперанса на Антарктычным паўвостраве. Новы рэкорд перавысіў папярэдні, устаноўлены ў 1998 годзе на той жа станцыі, адразу на 2°C, піша Euronews.

Па словах навукоўцаў, тэмпература апынулася прыкладна на 20°C вышэй за кліматычную норму для гэтага часу года. Рэкорд быў устаноўлены на фоне працяглай хвалі цяпла, з-за якой максімальныя дзённыя тэмпературы ў рэгіёне трымаюцца вышэй за нуль ужо тры тыдні запар. Анамальна цёплыя паветраныя масы з поўначы закранулі значную частку паўвострава.

На некаторых тэрыторыях замест звычайнага снежнага покрыва з’явілася адкрытая зямля, а на востраве Кінг-Джордж даследчыкі паведамілі пра маштабнае раставанне снегу і лёду. Ападкі ў выглядзе дажджу назіраліся нават на вяршыні ледніка Колінз. Навукоўцы папярэджваюць, што падобныя падзеі могуць паскорыць наступствы кліматычнага крызісу.

Згодна з нядаўнім даследаваннем, пры захаванні высокіх выкідаў парніковых газаў плошча марскога лёду ў раёне Антарктычнага паўвострава можа скараціцца на 20%. Гэта створыць пагрозу для экасістэм рэгіёна, уключаючы крыля, кітоў і пінгвінаў. Даследчыкі падкрэсліваюць, што будучыня Антарктыды шмат у чым залежыць ад рашэнняў па скарачэнні выкідаў, якія прымаюцца ўжо сёння.