У пяці раёнах Беларусі цалкам забаранілі наведванне лясоў

У Беларусі працягваюць дзейнічаць абмежаванні на наведванне лясоў з-за пажаранебяспечнай абстаноўкі. Паводле даных інтэрактыўнай карты Міністэрства лясной гаспадаркі, поўная забарона ўведзена адразу ў пяці раёнах Брэсцкай вобласці.

Гаворка ідзе пра Жабінкаўскі, Іванаўскі, Кобрынскі, Пінскі і Столінскі раёны, дзе наведванне лясных масіваў часова забаронена.

Яшчэ ў шасці раёнах Брэсцкай вобласці — Бярозаўскім, Брэсцкім, Драгічынскім, Івацэвіцкім, Камянецкім і Маларыцкім — дзейнічаюць абмежаванні на наведванне лясоў. Аналагічныя меры ўведзены і ў дзесяці раёнах Гродзенскай вобласці: Бераставіцкім, Ваўкавыскім, Гродзенскім, Зэльвенскім, Іўеўскім, Астравецкім, Ашмянскім, Свіслацкім, Слонімскім і Смаргонскім.

У Мінлясгасе рэкамендуюць перад паездкай у лес правяраць актуальную інфармацыю на афіцыйным сайце ведамства. Даныя на інтэрактыўнай карце аператыўна абнаўляюцца. Удакладніць сітуацыю таксама можна ў мясцовых райвыканкамах і лясгасах.