"Ходзім строем, спяваем “Кацюшу”". Чаму вучаць школьнікаў у абавязковых вайсковых лагерах

У прапагандысцкім выданні "Мінск-навіны" выйшаў рэпартаж пра вучэбна-палявыя зборы дзесяцікласнікаў. Так у Маскоўскім раёне сталіцы праз лагеры прайшлі больш за 990 юнакоў. Частка з іх праходзіла зборы ў цэнтрах дапрызыўнай падрыхтоўкі школ. Каля 100 падлеткаў жылі ў намётавых лагерах, размешчаных на тэрыторыі вайсковых частак.

Адзін з такіх стацыянарных намётавых лагераў упершыню быў створаны на базе 56-га асобнага палка сувязі, які дыслакуецца на тэрыторыі вайсковага гарадка ва Уруччы.

Чаму ж там вучылі дзесяцікласнікаў?

З рэпартажу стала вядома, якую "вайсковую навуку" асвойвалі падлеткі.

Еўрарадыё сабрала гэта ў спіс:

• "Хлопцаў вучылі тактычнай медыцыне, абыходжанню са зброяй і іншым навыкам, неабходным салдату ў баі";

• "Практычная адпрацоўка баявых дзеянняў";

• "Хлопцы трэніраваліся капаць акоп у ляжачым становішчы сапёрнай лапаткай";

• "Адпрацоўка страявой падрыхтоўкі";

• "Удзельнікі вучыліся разгортванню палявога кабелю, падключэнню і наладцы сродкаў сувязі, усталяванню сувязі";

• "Хадзілі строем, спявалі “Кацюшу”;

• "Навучыліся дзейнічаць адзінай камандай, хадзіць у нагу, выразным строем";

• "Навучыліся дысцыпліне";

• "Адпрацоўвалі падрыхтоўку да стральбы з розных палажэнняў: лежачы, з калена, седзячы і стоячы";

• "Вывучаем вайсковыя дысцыпліны".

Нагадаем, што ў 2026 годзе ў Беларусі будуць працаваць 138 лагераў ваенна-патрыятычнага профілю, разлічаных больш чым на 13 тысяч школьнікаў. Усяго запланавана 198 змен.

47 лагераў будуць размешчаныя непасрэдна на базе вайсковых частак, з іх 33 будуць працаваць у кругласутачным рэжыме.

Яшчэ 91 лагер ваенна-патрыятычнага кірунку арганізуюць школы.