Фэст на Нямізе, прызначаны на 30 траўня, перанеслі на іншую дату
Станцыя метро "Няміга" / Еўрарадыё
Велакарнавал "Viva, Ровар!" і вялікі канцэрт фэсту "Настрой — лета" ў Мінску пераносяцца на наступны тыдзень. Пра новую дату будзе паведамлена дадаткова, гаворыцца ў тг-канале Мінгарвыканкама.
Прычынай называюць кепскі прагноз надвор'я на суботу: "У сувязі з дрэннымі ўмовамі надвор'я (паводле інфармацыі МНС у другой палове дня чакаюцца дажджы, навальніцы і моцны парывісты вецер) прынята рашэнне аб пераносе мерапрыемстваў".
Таксама 30 траўня з 14:00 адмяняюцца ўсе мерапрыемствы летняга музычна-турыстычнага сезона па горадзе.
30 траўня — дзень, калі ў 1999 годзе падчас канцэрту каля Палаца спорту ў штурханіне загінулі 53 чалавекі. Помнік ім стаіць каля ўваходу на станцыю метро "Няміга". Сёлетні забаўляльны канцэрт прызначылі ў трагічную дату ў тым жа месцы, што выклікала хвалю абурэння ў сацсетках.
