Стала вядома, з якімі фінансавымі паказчыкамі завяршыла год "школа мамы Колі"

Стала вядома, з якімі фінансавымі паказчыкамі завяршылі 2025 год прыватныя школы ў Беларусі. Пасля ўвядзення абавязковага ліцэнзавання іх у краіне засталося толькі шэсць.

Іх справаздачнасць вывучылі журналісты "Бюро". Гэта школы "Канкорд", "Эка-Эл", "Альтэрнатыва", "Іхвіс", "Елісеевы палі" і Мінская міжнародная гімназія.

Сярэдняя школа "Альтэрнатыва" завяршыла 2025 год з выручкай 5,3 мільёна рублёў і чыстым прыбыткам 1,8 мільёна рублёў. Прычым 127 тысяч рублёў школа атрымала летась у выглядзе бязвыплатнай ці спонсарскай дапамогі.

Прыватная школа "Эка-Эл" стала рэкардсменкай па выручцы сярод прыватных школаў – 7,6 мільёна рублёў. Але чысты прыбытак склаў толькі 81 тысячу, ці каля 1% ад выручкі.

У прыватнай школе "Іхвіс", звязанай са Свята-Елісавецінскім жаночым манастыром, выручка за мінулы год склала 1,5 мільёна рублёў, а чысты прыбытак быў амаль удвая большым – 2,9 мільёна рублёў. Тлумачыцца гэта тым, што школа атрымала 1,8 мільёна іншых даходаў па бягучай дзейнасці і 735 тысяч даходаў па інвестыцыйнай дзейнасці. Яшчэ 742 тысячы рублёў склала мэтавае фінансаванне.

Мінская міжнародная гімназія, заснаваная Ірынай Абельскай, маці Мікалая Лукашэнкі, завяршыла 2025 год з выручкай 3,5 мільёна рублёў. Чысты гадавы прыбытак гімназіі склаў 591 тысячу рублёў. Пры гэтым навучальная ўстанова атрымала найбольшае з усіх прыватных школ мэтавае фінансаванне — 1,8 мільёна рублёў.

Выручка школы "Елісеевы палі" за 2025 год склала 2 мільёны рублёў, а прыбытак — 1,3 мільёна рублёў. У тым жа годзе кампанія накіравала 929 тысяч на выплату дывідэндаў: уласнік атрымаў значную частку прыбытку.

Магілёўская школа "Канкорд" летась атрымала выручку 1,7 мільёна рублёў, а чысты прыбытак склаў 118 тысяч. Гэтай школа атрымала найменшае сярод шасці ўстановаў мэтавае фінансаванне — 18 тысяч рублёў.