Арктычны чэрвень і “бітва” за бульбу. Якім будзе лета ў Беларусі?

Прагноз на вясну, якім з Еўрарадыё падзяліўся кліматолаг Уладзіслаў Шумак у канцы лютага, апраўдаўся. Надвор’е аказалася надзвычай пераменлівым: ад рэзкай спёкі да халадоў, з нераўнамернымі ападкамі, часам — нават са снегам.

Чаго ж чакаць беларусам ад надыходзячага лета?

Эксперт папярэджвае: расслабляцца не варта.

Непрадказальны чэрвень і арктычныя “сюрпрызы”

Сучасныя мадэлі развіцця надвор’я паказваюць, што нас чакаюць вельмі рэзкія ваганні тэмператур. Нават у чэрвені ў некаторых частках Беларусі магчымае вяртанне холаду праз пранікненне арктычнага паветра.

У той жа час чакаецца даволі сухі перыяд. Мадэлі развіцця надвор’я паказваюць, што для большай часткі краіны — перш за ўсё для цэнтральных і паўднёвых абласцей — будзе характэрная кліматычная засуха. Паўночнай частцы можа пашчасціць трохі больш: там выпадзенне дажджоў чакаецца набліжаным да кліматычнай нормы.

Бітва за ўраджай: засуха, замаразкі і лёс бульбы

Садаводам і агароднікам у гэтым сезоне трэба быць напагатове і давяраць толькі кароткатэрміновым прагнозам (на найбліжэйшыя дні), дакладнасць якіх дасягае 80%.

Канец ліпеня — пік гарачыні і каварны ультрафіялет

Самым гарачым перыядам лета, паводле мадэляў развіцця надвор’я, стане канец ліпеня і пачатак жніўня. Да гэтых хваль гарачыні трэба рыхтавацца загадзя — правільна сябе паводзіць: піць ваду, абараняцца ад сонца і знаходзіцца ў цені.

Важна памятаць, што ультрафіялет уздзейнічае на скуру нават пры невялікай воблачнасці. Сонца будзе вельмі актыўным, таму акуляры ад сонца і крэмы з SPF неабходныя ўсім, хто адчувальны да выпраменьвання.

Увага — кляшчы! Чаму яны сталі больш небяспечнымі?

Надвор’е ўплывае і на актыўнасць насякомых. Кляшчы вельмі лёгка адаптуюцца да змен клімату. Цяпер іх цыкл развіцця пачынаецца значна раней, чым нават 5–10 гадоў таму: як толькі ўсталёўваецца любая станоўчая тэмпература, яны ўжо актыўныя. Для абароны варта выкарыстоўваць усе спосабы — ад спецыяльнага адзення да араматычных маслаў.

Новая рэальнасць: клімат змяняецца, і мы таксама павінны

Усё, што адбываецца — гэта не проста “глабальнае пацяпленне”. Змены клімату ў нашым поясе выяўляюцца перадусім у непрадказальнасці, рэзкіх скачках тэмпературы і змяненні характару ападкаў.

Гэта новая рэальнасць, якая ўплывае на жыццё кожнага чалавека і на эканоміку краіны. Да гэтых змен трэба рыхтавацца і адаптавацца: клімат змяняецца. Мы таксама павінны мяняцца.