Бацька адсудзіў у сям'і палітуцекачоў прыёмнае дзіця і хоча вывезці яго ў Беларусь

Біялагічны бацька адсудзіў у палітуцякачкі Ганны Канавалавай аднаго з прыёмных дзяцей і хоча з'ехаць з ім у Беларусь. Хлопчыка мусяць перадаць яму 27 чэрвеня — і да гэтага часу суд наўрад ці паспее разгледзець апеляцыю, якую падала Канавалава.

Ганна Канавалава і двое яе ўнукаў, Анастасія і Іван, з'ехалі з Беларусі ва Украіну, а адтуль — у Польшчу. Бацькі гэтых дзетак тады былі ў турме, асуджаныя на доўгія тэрміны праз палітыку. Неўзабаве ў сям'і з'явіліся яшчэ двое дзетак — Цімур і Марсэль. Іх маці не вытрымала цяжкасцяў эміграцыі і адмовілася ад іх, а неўзабаве памерла.

У 2023-м Ганне напісаў біялагічны бацька Марсэля. Яна пагадзілася, што хлопчыку патрэбны кантакт з бацькам, і сама дапамагла яму зрабіць польскую візу.

Далей мужчына падаў у суд, каб вярнуць сабе апеку над дзіцем. "Я гэта добра разумела, бо таксама хацела, каб у хлопчыка быў бацька. Але тады я не ведала, што ён мае намер забраць яго ў Беларусь", — прыгадвае Ганна ў гутарцы з wyborcza.pl.

Суд пацвердзіў, што Марсэль называе бацьку татам і чакае сустрэчаў з ім. Было вынесенае рашэнне на карысць бацькі, бо "ён не ўяўляе пагрозы для дзіцяці", а "ўтрыманне хлопчыка пад апякунствам з'яўляецца неабгрунтаваным і супярэчыць яго інтарэсам, якія ў першую чаргу дасягаюцца праз выхаванне ўласнымі бацькамі".

Праўда, на той час мужчына не расказваў пра свае планы вярнуцца ў Беларусь. Калі пра гэта стала вядома, Ганна Канавалава аспрэчыла рашэнне суда. Але ўжо 27 чэрвеня хлопчык мусіць быць вызвалены з-пад яе апекі і перададзены бацьку.