Нямецкі міністр апынуўся ў цэнтры скандалу з-за выкарыстання ШІ
Карстэн Вільдбергер / picture alliance
Міністр лічбавізацыі Германіі Карстэн Вільдбергер стаў фігурантам расследавання газеты Die Zeit, паведамляе DW.
Журналісты прааналізавалі выступленні і публікацыі палітыка з дапамогай спецыяльнага ПЗ для выяўлення ШІ-тэкстаў. Напрыклад, вясновы артыкул Вільдбергера ў газеце Handelsblatt мае 99% верагоднасці таго, што матэрыял быў створаны ШІ.
Увагу да яго тэкстаў і прамоў прыцягнулі характэрныя для ШІ-памочнікаў стылістычныя асаблівасці: частае выкарыстанне паўтаральных канструкцый, пералічэнняў і абстрактных метафар.
Die Zeit таксама вывучыла каля 30 вусных прамоў Вільдбергера. Аналіз паказаў, што большасць з іх напісаны людзьмі, аднак у некалькіх выступленнях былі выяўлены прыкметы выкарыстання ШІ. Сярод іх апынуліся і прамовы, вымаўленыя ў бундэстагу, і выступленне ў Atlantic Council у Вашынгтоне.
Міністэрства лічбавізацыі Германіі не адмаўляе выкарыстання новых тэхналогій. Больш за тое, там пацвердзілі, што міністр і яго супрацоўнікі прымяняюць ШІ як працоўны інструмент пры падрыхтоўцы матэрыялаў, аднак канчатковая адказнасць за змест тэкстаў заўсёды застаецца за чалавекам.
