Будаўніцтва стадыёна для "МЛ Віцебск" адкладаецца — інсайдар
Адзін з першых праектаў стадыёна / "Ухо"
Кіраўніцтва дзейнага чэмпіёна Беларусі па футболе "МЛ Віцебск" перанесла будаўніцтва ўласнага стадыёна на нявызначаны тэрмін. Пра гэта паведамляе канал "Ухо", вядомы інсайдамі з беларускага футбола.
Улетку 2025 года ўладальнік клуба Арцём Лявонаў сцвярджаў, што праектаванне арэны зойме 2–3 месяцы, і прагназаваў, што само будаўніцтва працягнецца 2–3 гады.
Але ў Віцебску да будаўніцтва пакуль так і не прыступілі.
Нагадаем, што годам раней прыватны футбольны клуб у Віцебску набыў стадыён і цір, размешчаныя побач з "Віцебскдрэў". Аб’екты нерухомасці былі прададзены з аўкцыёну, за іх заплацілі амаль 345 тысяч рублёў.
Улетку 2025 года клуб узяў у 25-гадовую арэнду зямлю пад узвядзенне спартыўнага комплексу ў горадзе. Сума здзелкі склала 203 тысячы долараў.
У самым пачатку 2025 года клуб набыў зямлю пад будаўніцтва стадыёна і базы, выкупіўшы былы аздараўленчы лагер "Бярозка" ў прыгарадзе Віцебска. Сума здзелкі не раскрывалася.
Які стадыён хоча пабудаваць клуб
Першапачаткова планавалі стадыён з умяшчальнасцю каля 5,5 тысячы гледачоў. Гэта мелася быць арэна трэцяй катэгорыі УЕФА. Але пазней канцэпцыя змянілася.
З улікам патрабаванняў трэцяй катэгорыі УЕФА спатрэбіцца больш месцаў, і ў праекце будзе дзве трыбуны. Клуб плануе спачатку пабудаваць адну трыбуну і пачаць праводзіць хатнія матчы на новай арэне.
А затым, калі будзе пабудавана другая трыбуна, плануецца прымаць гульні еўракубкаў.
