У Варшаве пачаўся суд над арганізатарам нападаў на расійскіх палітэмігрантаў

У Варшаве пачалі судзіць Анатоля Блінова — падручнага расійскага алігарха Леаніда Неўзліна. Блінова абвінавачваюць у арганізацыі нападаў на расійскіх апазіцыянераў за мяжой.

Па адной справе з ім праходзіць грамадзянін Беларусі Віктар Павелка, піша @mediazona_exclusive.

Блінову інкрымінуюць адразу некалькі артыкулаў, сярод якіх пашкоджанне маёмасці, прымяненне гвалту, незаконнае ўтрыманне чалавека і нанясенне цялесных пашкоджанняў. Паводле следства, ён выконваў ролю арганізатара, то бок аддаваў загады.

Здзяйснялі ж злачынствы іншыя людзі — пераважна грамадзяне Польшчы з колаў футбольных фанатаў. Аднак ёсць сярод іх і беларус — Віктар Павелка. Вядома, што пасля затрымання ён пачаў супрацоўнічаць са следствам.

На суд прыехаў Леанід Волкаў — былы паплечнік Аляксея Навальнага. У сакавіку 2024 года Волкава збілі побач з домам у Вільні. Ён праходзіць па справе ў якасці пацярпелага.