На экс-палітвязня Паўла Мажэйку пачалі новую справу і запрасілі "бяспечна" вярнуцца

На экс-палітвязня Паўла Мажэйку ў Беларусі пачалі новую крымінальную справу.

Як піша "Гарадзенская праваабарона", справу пачалі яшчэ 11 траўня 2026 года. Хутчэй за ўсё Мажэйку інкрымінуюць адзін з палітычных артыкулаў — арт. 361-4 КК (садзейнічанне экстрэмісцкай дзейнасці).

Сам экс-палітвязень кажа, што не ведае дакладнай сутнасці справы. Але ў дачыненні да яго сваякоў і знаёмых у Беларусі правялі "дзясяткі так званых працэсуальных дзеянняў" — ператрусы, допыты і нефармальныя размовы.

Павел кажа, што сілавікі падчас ператрусаў шукаюць менавіта яго і "здзіўляюцца", што ніяк не могуць знайсці. (Мажэйку разам з групай іншых палітвязняў прымусова вывезлі ў Літву 11 верасня 2025 года.)

Падчас размоваў з роднымі Мажэйкі супрацоўнікі КГБ абавязваюць іх перадаць яму, што Павел можа беспраблемна і бяспечна вярнуцца ў Беларусь. Таксама Мажэйка сцвярджае, што такія ж "запрашэнні" перадаюць і іншым палітвязням, прымусова вывезеным з Беларусі.