Дэпартаванай з Беларусі жыхарцы Гвінеі вярнулі дачку
Мар'ям Сума з дачкой / Консул Гвінеі трымае на руках маленькую Сабіну / Радыё Свабода
Дэпартаванай з Беларусі жыхарцы Гвінеі вярнулі дачку. Дзяўчынку дзевяць месяцаў пратрымалі ў дзіцячым доме.
"Я не ведаю, як правільна выказаць свае думкі. Радасьць такая велізарная! Я, маці, разлучаная з сваім дзіцем ад самага нараджэння, нават не магу пераказаць выпрабаванні, з якімі сутыкнулася цягам апошніх месяцаў, — расказала жанчына "Радыё Свабода". — Я дзякую ўладам Беларусі, што выратавалі адразу два жыцці, і міжнародным гуманітарным арганізацыям — ААН, асабліва UNICEF-Беларусь, агенцтву AFP і іншым медыя.
Яны сапраўды змагаліся за мяне і маю дачку. Дзякуючы ім урад Гвінеі, ведаючы, што адна з гвінейскіх грамадзянак апынулася ў цяжкай сытуацыі, прыйшоў на дапамогу, каб маё дзіця магло быць з маці".
Маці не змагла сама прыехаць па дзіця, бо ёй забаронены ўезд у Беларусь. Амбасада Гвінеі ў Маскве зрабіла для маленькай Сабіны падарожны дакумент, арганізацыяй вандроўкі займаліся два аддзяленні UNICEF. Пераезд заняў некалькі дзён.
Дзяўчынку, якой нядаўна споўнілася паўтара года, даставілі ў сталіцу Гвінеі Канакры самалётам з Масквы. Яе суправаджалі гвінейскі консул і медычны супрацоўнік.
А прывёў да гэтай сумнай гісторыі са шчаслівым канцом міграцыйны крызіс, які ўлады Беларусі арганізавалі ля межаў Еўрасаюза. Мар'ям Сума прыехала ў нашую краіну, каб нелегальна трапіць у ЕС. Стрэс, які ёй давялося перажываць, прывёў да таго, што Сабіна нарадзілася на два месяцы раней за меркаваную дату.
Дактары выхадзілі дзяўчынку, але маці выставілі рахунак — каля 33 тысяч долараў. А неўзабаве арыштавалі за парушэнне міграцыйных правілаў. І прымусілі сесці ў самалёт без дачкі.
