Латвійскія вайскоўцы ўжылі слезацечны газ супраць мігрантаў з тэрыторыі Беларусі

Латвійскія вайскоўцы, якія дапамагаюць ахоўваць мяжу з Беларуссю, сутыкнуліся з агрэсіўнымі мігрантамі.

За апошнія суткі толькі вайскоўцы спынілі пяць спробаў парушэння мяжы, паведамляе прэс-служба Узброеных сіл Латвіі. Мігранты паводзілі агрэсіўна і кідаліся палкамі ў бок ахоўнікаў мяжы.

"Для спынення незаконных дзеянняў і прадухілення далейшай эскалацыі сітуацыі вайскоўцы ўжылі слезацечны газ. Паколькі асобы працягвалі ігнараваць законныя патрабаванні ўладаў і дэманстравалі агрэсіўныя паводзіны, быў зроблены адзін папераджальны стрэл у паветра, пасля чаго яны адступілі на тэрыторыю Беларусі", — паведамляе вайсковая прэс-служба.

Апошнім часам Латвія стала асноўным напрамкам міграцыйнага ціску. За 21 ліпеня на беларуска-латвійскай мяжы было зафіксавана 67 спробаў нелегальнага пераходу, а ў Літве і Польшчы — ніводнай.

Пракуратура Латвіі днямі пачала крымінальную справу супраць службовых асоб беларускай памежнай службы: іх падазраюць у арганізацыі нелегальнай міграцыі.