Эксперты заклікалі мадэрнізаваць стадыёны Чэмпіянату свету па футболе праз моцную спёку
Аргенцінскі футбаліст Ніка Гансалес астуджаецца падчас сваёй трэніроўкі на Чэмпіянаце свету. / The Associated Press
У разгар Чэмпіянату свету па футболе 2026 года эксперты зноў загаварылі пра неабходнасць адаптацыі спартыўнай інфраструктуры да змены клімату. Падставай сталі шматлікія матчы, якія праходзілі ва ўмовах экстрэмальнай спёкі.
Паводле аналізу Reuters, больш за чвэрць гульняў турніру прайшлі пры небяспечных тэмпературных умовах: у 27 матчах паказчык вільготнасна-тэмпературнага індэкса (WBGT) перавысіў 28°C — узровень, пры якім міжнародны прафсаюз футбалістаў FIFPRO рэкамендуе пераносіць або адкладаць сустрэчы.
Кіраўнік экалагічнай кансалтынгавай кампаніі SaveMoneyCutCarbon Марк Сэйт лічыць, што большасць стадыёнаў былі спраектаваныя з улікам кліматычных умоў мінулага і сёння ўжо не адпавядаюць новым выклікам. На яго думку, масавая ўстаноўка кандыцыянераў не вырашыць праблему, бо павялічвае энергаспажыванне і спрыяе далейшаму пацяпленню. Замест гэтага эксперт прапануе мадэрнізаваць існыя арэны: палепшыць сістэмы вентыляцыі, выкарыстоўваць адбівальныя дахавыя пакрыцці, спецыяльнае шкло, якое змяншае награванне, а таксама ўкараняць энергаэфектыўнае асвятленне і тэхналогіі эканоміі вады.
На фоне рэкорднай спёкі ўсё часцей гучаць прапановы змяніць падыход да правядзення чэмпіянатаў свету. Сярод мер, якія абмяркоўваюцца, — перанос матчаў на вячэрні час і выбар стадыёнаў з улікам кліматычных рызык. Аднак, на думку экспертаў, карэкціроўка раскладу павінна дапаўняцца доўгатэрміновай мадэрнізацыяй спартыўных аб'ектаў, каб забяспечыць бяспеку гульцоў, персаналу і заўзятараў ва ўмовах працяглага глабальнага пацяплення.
