Рэканструкцыя моста праз Свіслач выклікала пытанні з-за работ з гістарычнымі элементамі

У Мінску ідзе рэканструкцыя моста праз Свіслач на праспекце Незалежнасці, аднак работы на аб’екце, які мае статус гісторыка-культурнай каштоўнасці, ужо выклікалі пытанні ў спецыялістаў. Гарадскія ўлады сцвярджаюць, што збудаванне захавае ранейшы знешні выгляд і колькасць палос руху, а будаўнікі тым часам дэмантавалі каля паловы старых канструкцый.

Паводле звестак "Мінск-Навіны", з моста знялі дарожнае пакрыццё і элементы, якія патрабуюць замены. Падрадчык таксама плануе аднавіць арачныя скляпенні, узмацніць канструкцыю маналітнай плітой і абнавіць гранітную абліцоўку. Пры гэтым у сацыяльных сетках з’явіліся прэтэнзіі да тэхналогіі правядзення работ: аўтары публікацый сцвярджаюць, што падчас ачысткі гранітных элементаў выкарыстоўваецца інструмент, які можа пашкоджваць верхні слой каменю і змяняць першапачатковую геаметрыю гістарычных дэталяў.

Улады Мінска заяўляюць, што рэканструкцыя ідзе па графіку і нават апярэджвае яго на 5–10%, а работы праводзяцца кругласутачна. Аднак тэлеграм-канал "Спадчына" звяртае ўвагу, што падчас рамонту аб’ектаў культурнай спадчыны ключавым пытаннем з’яўляецца не толькі хуткасць выканання работ, але і захаванне арыгінальных матэрыялаў і архітэктурных элементаў, аднавіць якія пасля пашкоджання можа быць немагчыма.