“Гэта будзе своеасаблівы хаб для ўсіх беларусаў” — Ціханоўская пра новы офіс у Варшаве

Лідарка дэмсіл у выганні Святлана Ціханоўская распавяла пра новы офіс у Варшаве. Гэта адбылося падчас сустрэчы на фестывалі Tutaka, што праходзіць да 19 ліпеня пад Беластокам, перадае “Белсат”.

“Тут [у Варшаве — Еўрарадыё] будзе крыху іншы фармат, чым у Вільні. Мы мяркуем, што гэта будзе своеасаблівы хаб для ўсіх беларусаў, каму трэба прыйсці, папрацаваць, пагаварыць.

Адзін паверх будзе адкрыты для такіх актыўнасцяў – кожны зможа прыйсці, паразмаўляць, пасядзець. Менавіта такім мы бачым гэты фармат”, — сказала Святлана Ціханоўская.

Паводле яе, у Польшчы “больш працы з беларусамі”, бо тут жыве вялікая колькасць суайчыннікаў і неабходна наведваць больш гарадоў.

Святлана Ціханоўская і шэраг супрацоўнікаў яе офісу пераехалі ў Варшаву з Вільні напрыканцы лютага 2026 года пасля таго, як Літва скараціла яе ахову.