На Браслаўскіх азёрах пабудуюць рэтрыт-цэнтр на месцы былой псіхбальніцы

На Браслаўскіх азёрах у Віцебскай вобласці з'явіцца маштабны дэтокс- і рэтрыт-цэнтр White Lotus. Пра гэта паведамляе Onliner. Выданне пагутарыла з кіраўніцай архітэктурнага бюро Pototskaya Architects, якое займаецца праектам, Крысцінай Патоцкай.

Комплекс размесцяць на тэрыторыі былой псіхіятрычнай бальніцы "Слабодка" ў аднайменным аграгарадку Браслаўскага раёна. Участак займае 12 гектараў, ён акружаны трыма азёрамі. Частка старых будынкаў 1950–1970-х гадоў будзе знесена, частка — рэканструявана.

На месцы галоўнага корпуса пабудуюць новы грамадскі будынак са спа, басейнам і рэстаранам здаровага харчавання, а таксама жылыя корпусы і 20 модульных дамкоў на двух чалавек. Усяго база адпачынку зможа змясціць да 160 чалавек.

На тэрыторыі таксама абсталююць экалагічныя сцежкі, зоны для адпачынку і актыўнасцяў: вяровачны гарадок, скаладром, пляцоўкі для вулічнага масажу, а для пастаяльцаў арганізуюць пешыя і водныя маршруты па Браслаўшчыне.

Праект ужо ўключаны ў дзяржаўную праграму развіцця турыстычнага патэнцыялу рэгіёна і атрымаў прэмію KUKHA 2026.

— Запуск першай чаргі будаўніцтва, у рамках якой на беразе возера з'явяцца модульныя дамы, запланаваны на красавік 2027 года. Што тычыцца другой чаргі, у якую ўваходзяць грамадскія будынкі, то яе рэалізацыя арыенціровачна намечана на 2029 год, — расказала Крысціна Патоцкая.

Паводле дадзеных выдання, некалькі гадоў таму былую бальніцу прадалі на аўкцыёне — адзіны ўдзельнік атрымаў комплекс будынкаў за 231 000 рублёў. Інвестарам праекта выступае прыватная кампанія ТАА "Рыв'ера Сеньёрэн Рэзідэнц".