Увесь свет гудзіць праз новую "Адысею", якую пакажуць і ў Беларусі

Увесь свет гудзіць праз новую "Адысею" Крыстафера Нолана. Але беларусы яе паглядзець пакуль не могуць — прэм'ера адбудзецца на тыдзень пазней за Еўропу і ЗША.

Тым часам «Адысея» ўжо атрымала ашаламляльныя водгукі крытыкаў. 

«Абсалютны трыумф», — піша The Guardian.

«Класіка ва ўсіх сэнсах. Мастацтва, якое пераносіць у іншыя сусветы і твор чыстага кінематографа», — піша The New York Times.
 

Праз дзень пасля прэм'еры «Адысея» мае на Rotten Tomatoes 95% «свежасці» ад крытыкаў і 97% — ад гледачоў. На IMDB ацэнка складае 8,3 з 10, а на Letterboxd — 4,3 з 10.

Цікава, што сярод карыстальнікаў расійскага «Кінапоіска» ацэнка ніжэйшая — 7,1. Хаця большасць юзэраў гэтага сайта не маюць магчымасці паглядзець «Адысею», бо ў РФ, як і ў Беларусі, прэм'ера адбудзецца толькі 25 ліпеня.

Спрэчкі вакол новай "Адысеі"

Увага да "Адысеі" прыкавана не толькі таму, што гэта новы фільм Крыстафера Нолана. Яшчэ да прэм'еры карціна выклікала спрэчкі з-за некаторых кастынгавых рашэнняў. У прыватнасці, частка карыстальнікаў крытыкавала выбар цемнаскурай акторкі Лупіты Ніёнга на ролю Алены Траянскай і ўдзел Эліёта Пейджа ў ролі Сінона. Пры гэтым у сацсетках нярэдка памылкова сцвярджалі, што Пейдж згуляў Ахілеса, хаця гэтага персанажа ў "Адысеі" наогул няма.

Яшчэ адной нагодай для дыскусій сталі касцюмы. Адны карыстальнікі раскрытыкавалі цёмныя даспехі Агамемнана, іншыя палічылі, што адзенне Тэлемаха, якога згуляў Том Холанд, не адпавядае гістарычнай эпосе.

Некаторыя супраціўнікі фільма заяўлялі, што не збіраюцца яго глядзець, і загадзя ставілі нізкія ацэнкі на розных кінаплатформах. У адказ іншыя карыстальнікі нагадвалі, што "Адысея" — гэта экранізацыя старажытнагрэчаскага эпасу з багамі, цыклопамі і іншымі міфалагічнымі істотамі, таму патрабаваць ад яе "гістарычнай дакладнасці" няслушна.