Нявеста расіяніна, які напаў на беларуса, зарабляе аўдыторыю на гісторыі пра "цкаванне"

Расіяніну-баксёру далі 5,5 гадоў за напад на беларуса на Зыбіцкай. Ягоная нявеста тым часам збірае дзясяткі тысяч лайкаў і сотні тысяч падпісчыкаў, выконваючы ролю ахвяры цкавання.

Падчас візіту ў Мінск у сакавіку 2026 расіянін Сяргей Цімафееў, які раней займаўся боксам, ударыў беларуса Андрэя Сцяпанчука пасля кароткай размовы на вуліцы Зыбіцкай. У выніку хлопец некаторы час правёў у коме, пасля атрымаў другую ступень інваліднасці.

Пасля інцыдэнту дзяўчына Сяргея, блогерка Ганна Парамонава, нічога не пісала ў сацсетках пра партнёра. Замест гэтага яна выкладала фота з адпачынку і са сваіх фатасэтаў.

Але пасля абвяшчэння прысуду Парамонава выклала адразу тры відэа са слязамі, якія агулам сабралі больш за 10 млн праглядаў.

Блогерка скардзіцца на несправядлівасць адносна яе, на "вайну, якую не яна пачала" і на нейкую траўлю. Таксама Парамонава распавядае пра тое, як сумуе па Сяргею (якога не згадвала ў сваім акаўнце з вясны).

У сваім тг-канале Ганна пайшла далей і піша, нібы сям'я пацярпелага Андрэя патрабавала ў яе набыць кватэру і г.д. А ў якасці "доказу" жадання дапамагчы пацярпеламу прыкладае распіскі пра перавод грошай прыватнай клініцы ў Маскве, дзе за іх нібы мусілі апераваць Андрэя.

Пры гэтым няма інфармацыі, што родныя Андрэя планавалі яго лекаваць менавіта там.

Цяпер блогерка збірае велічэзную аўдыторыю на сваіх "пакутах". Толькі ў тэлеграме за некалькі дзён яна атрымала 300 тысяч новых падпісчыкаў (было 220, стала 530 тысяч).