Стала вядома пра нечаканы бізнес Дар'і Домрачавай у Беларусі

Чатырохразовая алімпійская чэмпіёнка па біятлоне Дар'я Домрачава мае ў Беларусі нечаканы бізнес. Адзінаццаць гадоў таму, увосень 2014-га, яна адкрыла ІП — гэта адбылося якраз пасля Алімпіяды ў Сочы, дзе яна заваявала тры залатыя медалі.

Як даведалася выданне "Зеркало" з дапамогай BELPOL, асноўны від дзейнасці ІП Домрачавай — здача ў арэнду ўласнай і арандаванай нерухомай маёмасці. У прыватнасці, яна валодае офіснымі памяшканнямі ў 33-павярховым бізнес-цэнтры Royal Plaza на праспекце Пераможцаў, 7А. Гэты будынак размешчаны недалёка ад гандлёвага цэнтра Galleria Minsk.

Выданне адзначае, што Royal Plaza ўвялі ў эксплуатацыю ў траўні 2014 года, у чэрвені біятланістка перастала служыць у КДБ, а ў верасні адкрыла ІП.

Домрачава мае ва ўласнасці чатыры памяшканні на 16-м паверсе. Іх агульная плошча — 474 квадратныя метры. Невядомыя ні час куплі, ні сума, якую яна выдаткавала на іх.

Офіс на чацвёртым паверсе Royal Plaza прадаюць па цане 8,5 тысячы рублёў за квадратны метр (на сёння крыху больш за 3000 долараў). Зыходзячы з гэтага атрымліваецца, што агульны кошт памяшканняў Домрачавай у гэтым бізнес-цэнтры можа скласці 1,44 мільёна долараў.

Пры здачы ў арэнду, як падлічыла "Зеркало", Домрачава штомесяц магла б атрымліваць за гэтыя памяшканні ад 22,8 да 28 тысяч рублёў (ад 8150 да 8500 долараў).

Таксама біятланістцы належаць дзве кватэры ў Мінску. Адна, плошчай 250 квадратных метраў, — у славутым "доме Чыжа" на вуліцы Старажоўскай. Другая, плошчай 57 квадратных метраў, размяшчаецца на вуліцы Каменнагорскай. Таксама спартоўка мае дом у статусным пасёлку Лапаравічы пад Мінскам.

Акрамя таго, у Домрачавай ёсць імянная крама адзення ды іншых спартыўных тавараў. Праўда, юрыдычна яна зарэгістраваная не на саму біятланістку, а на ІП яе мамы — Ларысы Мінінай.