Адзіны прыватны аператар бізнэс-джэтаў у Беларусі належыць зяцю экс-прэм'ера

Беларуская авіякампанія "Байскай" абнародавала фінансавыя паказчыкі за мінулы год. Выручка вырасла ў тры з паловай разы ў параўнанні з 2024-м — да 27 мільёнаў рублёў. Чысты прыбытак падвоіўся і склаў амаль 11 мільёнаў рублёў, пішуць расследвальнікі "Бюро".

Авіякампанія "Байскай" –— адзіны ў Беларусі прыватны аператар бізнэс-джэтаў. З’явілася яна ў 2017 годзе. Па дамоўленасці з уладамі пабудавала цэнтр бізнэс-авіяцыі ў Нацыянальным аэрапорце Мінск.

Як пішуць журналісты-расследвальнікі, гэта бізнэс Сяргея Бацяноўскага. Дзякуючы "Кіберпартызанам" атрымалася пацвердзіць, што ён з’яўляецца зяцем былога прэм’ер-міністра Беларусі Сяргея Лінга, які кіраваў урадам у 1997–2000 гады.

Сваім часам Бацяноўскі ўзначальваў прадстаўніцтва расійскага акцыянернага таварыства "Абарончыя сістэмы" ў Беларусі, якое працавала ў вайсковай сферы. Цяпер ён кіруе беларускім вайсковым прадпрыемствам "АКБ-ТСП", якое трапіла пад санкцыі ЕС і ЗША.