Каля 80 адвакатаў-валанцёраў для беларусаў: навошта патрэбная КР. Меркаванне юрыста
Міхаіл Кірылюк прыводзіць простую і зразумелую многім беларусам аналогію / t.me/rada_vision/
— Каардынацыйная рада — гэта ў пэўным сэнсе каля васьмідзесяці такіх адвакатаў-валанцёраў, якія бясплатна, фактычна за грошы Еўрасаюза, два гады будуць спрабаваць прадстаўляць і абараняць інтарэсы беларусаў, — расказвае ў эфіры Еўрарадыё юрыст НАУ Міхаіл Кірылюк.
Працягваецца галасаванне ў КР 4-га склікання. Яно праходзіць на фоне бесперапынных кібератак на платформу Паўла Лібера. На гэты дзень прагаласавалі 1500 чалавек. Гэтая лічба толькі падлівае алею ў агонь спрэчак вакол гэтай кампаніі. За тры дні да заканчэння бакі абменьваюцца аргументамі за і супраць.
Міхаіл Кірылюк прыводзіць зразумелы аргумент, навошта беларусам патрэбная КР. Гэты орган здольны прадстаўляць і абараняць інтарэсы беларусаў.
— Калі мы глядзім сацыялогію па Расіі, то бачым, што большасць расіян падтрымлівае Пуціна і ў той ці іншай ступені падтрымлівае вайну. І гэта працягваецца ўжо ўсе апошнія гады.
У Беларусі сітуацыя іншая: большасць беларусаў супраць вайны, большасць беларусаў хоча ездзіць у Еўрасаюз і не хоча варожасці з ЕС. Гэта два вельмі розныя, фактычна дыяметральна супрацьлеглыя грамадствы.
Для нас гэта выглядае відавочным, але для еўрапейцаў гэта далёка не заўсёды так зразумела. І менавіта таму патрэбная Каардынацыйная рада — каб тлумачыць гэтыя адрозненні і дамагацца асобнага падыходу да беларусаў і расіян. Бо для многіх у Еўропе гэта ўсё яшчэ ўспрымаецца як нешта вельмі падобнае, — упэўнены юрыст.
