Суд патрабуе ад Судаленкі доказаў, што "экстрэмісцкая" старонка TikTok належыць яму

Суд Маладзечанскага раёна Мінскай вобласці адмовіўся прымаць апеляцыйную скаргу Леаніда Судаленкі. Праваабаронца спрабаваў абскардзіць судовае рашэнне ад 27 траўня 2026 года, якое прызнавала яго TikTok-старонку "экстрэмісцкімі матэрыяламі".

У сваёй апеляцыі Судаленка прасіў адмяніць рашэнне суда першай інстанцыі, указваючы, што названая старонка належыць яму, піша праваабарончы цэнтр "Вясна".

Адказ ад суддзі Вольгі Гуд, датаваны 24 чэрвеня, выглядае феерычна. Яна адмовілася прымаць скаргу, бо... у апеляцыі няма звестак, якія пацвярджаюць, што згаданая TikTok-старонка належыць заяўніку. Таксама яна заявіла пра адсутнасць доказаў таго, што абскарджванае рашэнне закранае яго правы ці абавязкі.

"Калі дзяржаўныя органы прызнаюць інфармацыйны рэсурс "экстрэмісцкім", але адначасова адмаўляюць асобе ў магчымасці аспрэчыць такое рашэнне, спасылаючыся на адсутнасць доказаў яе сувязі з гэтым рэсурсам, гэта фактычна пазбаўляе чалавека доступу да судовай абароны", — звяртаюць увагу праваабаронцы.

Судаленка падаў прыватную скаргу на гэтую адмову ў Мінскі абласны суд.

Леанід Судаленка — праваабаронца, былы палітвязень, асуджаны за дапамогу рэпрэсаваным. Пасля адбыцця пакарання ўлетку 2023-га пакінуў Беларусь.