У полацкай школе правяраюць словы маці пра збіццё сына на трэніроўцы па дзюдо

У полацкай спартовай школе працягваецца праверка. Яна выкліканая гісторыяй мясцовай жыхаркі Ганны Захаравай, апублікаванай у сацсетках. Відэа атрымала мільёны праглядаў.

Палачанка заявіла, што яе дзевяцігадовы сын Клім вярнуўся з трэніроўкі збітым. Па словах жанчыны, хлопчык не змог зрабіць адно з практыкаванняў і трэнер нібыта прымусіў іншых дзяцей "пакараць" яго.

"У Кліма не атрымлівалася зрабіць практыкаванне, трэнер сказаў: пакуль Клім не даробіць і ў яго не атрымаецца, усе астатнія прысядаюць. Гэта працягвалася нейкую колькасць часу, і ў канцы трэніроўкі трэнер сказаў: "Ну, я дазваляю вам яго пакараць за гэта", — расказала маці. Яна дадала, што праўдзівасць здарэння пацвердзіў другі яе сын, які таксама займаецца ў гэтай групе.

Дзяржаўнае выданне "Полацкі веснік" піша, што на публікацыю маці ў сацсетках аператыўна адрэагавалі кіраўніцтва спартшколы, аддзел спорту Полацкага райвыканкама, РАУС і медыкі. "Паводле інфармацыі дзіцячай паліклінікі, наяўнасць збіцця ў вобласці твару і рук у дзіцяці не зафіксавана, мелася маленькая ранка ў раёне ілба. Вывучаныя матэрыялы з камер відэаназірання ў спартовай установе", — гаворыцца ў публікацыі.

Паведамляецца таксама, што маці з сынам і трэнер былі выкліканыя ў дзень здарэння ў Полацкі РАУС. Там з імі правялі гутарку, па выніках якой бакі напісалі, што прэтэнзій адзін да аднаго не маюць. Тым не менш у спартшколе праходзіць службовая праверка.