Каб не занялі расіяне — чыноўнікі патлумачылі адмену платных месцаў у медуніверсітэтах

Сёлета набор на медыцынскія спецыяльнасці ў ВНУ праходзіць у новых умовах. Была павялічаная колькасць месцаў для абітурыентаў з мэтавым накіраваннем, а платныя месцы засталіся толькі для завочнага навучання па спецыяльнасці "Фармацыя".

Мэтавых накіраванняў ужо цяпер абітурыенты ўзялі больш, чым існуе месцаў у ВНУ. Пра гэта на тэлеканале СТБ расказала намесніца міністра аховы здароўя Алена Богдан.

А рэктарка Гомельскага дзяржаўнага медуніверсітэта Ірына Назаранка агучыла версію, чаму ў ВНУ практычна адмянілі платныя месцы. Паводле яе, гэта робіцца не для прывязкі выпускнікоў да месца размеркавання, а для абароны беларускіх абітурыентаў перад расіянамі.

"Якасную медыцынскую адукацыю наша дзяржава дае магчымасць атрымаць бясплатна за кошт павелічэння мэтавага набору і за кошт павелічэння колькасці бюджэтных месцаў. Каб нашы высокаматываваныя абітурыенты маглі на роўных умовах паступаць у медыцынскі ўніверсітэт, не баючыся, што платныя месцы пяройдуць для іншых устаноў альбо яшчэ пойдуць платныя месцы для расіян, таму што звычайна яны таксама займалі гэтыя месцы. А так у нас будзе для нашых грамадзян Рэспублікі Беларусь", — заявіла Назаранка.

У яе падтрымку Алена Богдан заявіла, што цяперашнія выпускнікі-платнікі амаль не бяруць свабодныя дыпломы, а хочуць атрымаць размеркаванне.