"Прававы прабел". У Беларусі прапанавалі абмежаваць выезд усім асуджаным

У Беларусі прапанавалі абмежаваць выезд за мяжу для ўсіх асуджаных, а не толькі тых, хто знаходзіцца пад прэвентыўным наглядам. З такой ініцыятывай выступіў дацэнт Акадэміі МУС Уладзімір Шабаль у сваёй працы, апублікаванай у часопісе міліцэйскай вышэйшай навучальнай установы.

Шабаль сцвярджае, што зараз нібыта існуе "прававы прабел", з-за якога асуджаныя па артыкулах, якія не прадугледжваюць ізаляцыю ад грамадства (напрыклад, да грамадскіх або выпраўленчых работ), могуць пакідаць тэрыторыю Беларусі, калі на іх не накладзены прэвентыўны нагляд.

"Нават у адносінах да такіх пакаранняў, як грамадскія і выпраўленчыя работы, адсутнасць забароны на выезд за межы Рэспублікі Беларусь дазваляе асуджаным дапускаць ухіленне ад адбывання пакарання без пагрозы прыцягнення да адказнасці за супрацьпраўныя дзеянні", — піша Шабаль.