Махляры рассылаюць паведамленні ад імя галоўнай рэдактаркі "Белсата"
Аліна Коўшык
Галоўная рэдактарка тэлеканала "Белсат" Аліна Коўшык папярэдзіла, што ад яе імя махляры рассылаюць фэйкавыя паведамленні.
На сваёй старонцы ў Фэйсбуку Коўшык паведаміла, што невядомыя просяць купляць Apple gift cards і перасылаць коды.
Яна назвала гэтае махлярства прымітыўным і звярнула ўвагу на тое, што нібыта "службовы" ліст напісаны па-польску з памылкамі і дасланы са скрынкі на сервісе inbox.ru.
"Выглядае гэта хутчэй як дрэнная пародыя, але, на жаль, нават такія рэчы часам спрацоўваюць. Калі ласка, не адказвайце на такія паведамленні, не перасылайце ніякіх кодаў, грошай ці сваіх дадзеных і проста ўважліва правярайце адрасы адпраўнікоў. Асабліва калі вас просяць нешта "тэрмінова" купіць ці аплаціць. На жаль, цяпер такія атакі рассылаюцца масава, проста па базах кантактаў", — адзначае кіраўніца "Белсата".
