У Польшчы затрымалі арганізатара схемы нелегальнай міграцыі праз мяжу з Беларуссю
Затрыманне арганізатараў трафіку мігрантаў / Straż Graniczna
Пагранічная служба Straż Graniczna паведаміла пра затрыманне 27-гадовага грамадзяніна Польшчы, падазраванага ў арганізацыі незаконнага перасячэння мяжы паміж Польшчай і Беларуссю у 2025 годзе. Паводле следства, ён часта мяняў месца жыхарства, каб схавацца ад праваахоўных органаў.
Падчас вобшуку ў яго таксама знайшлі 2,2 кілаграмаў мефедрону. Мужчыну абвінавацілі ў арганізацыі нелегальнай міграцыі і захоўванні наркотыкаў, ён арыштаваны на тры месяцы.
Паралельна была раскрыта другая схема ў Мазавецкім і Сілезскім ваяводствах, звязаная з афармленнем фіктыўных дазволаў на сезонную працу. Праз яе замежнікі атрымлівалі дакументы для віз і ўезду ў Польшчу і краіны Шэнгенскай зоны пад выглядам працаўладкавання.
Сярод кліентаў былі грамадзяне Турцыі, Пакістана, Малдовы, Узбекістана, Беларусі, Непала, Туркменістана, Грузіі і Індыі. Арганізатары атрымлівалі за паслугі некалькі сотняў еўра за кожнага кліента.
Следства ўстанавіла, што маштабы адной са схем маглі перавышаць тысячу чалавек. У межах аперацыі затрыманы чацвёра грамадзян Польшчы і адзін грамадзянін Украіны.
Раней, у траўні, у Мазавецкім ваяводстве ўжо былі арыштаваныя яшчэ сем чалавек, уключаючы супрацоўнікаў кадравых структур. Падчас усіх аперацый канфіскаваныя дакументы, электронныя носьбіты і буйныя сумы грошай.
