Крэмль можа арганізаваць дыверсіі і забойствы ў ЕС з дапамогай рускай мафіі — СМІ

Крэмль можа выкарыстоўваць крымінальныя сеткі з мафіёзнымі метадамі, у тым ліку ў Германіі, у рамках гібрыднай вайны. Пра гэта гаворыцца ва ўрадавым адказе на парламенцкі запыт партыі "Зялёныя". Гэты дакумент атрымала ў распараджэнне выданне Spiegel.

"Супрацоўніцтва расійскіх структур з актарамі арганізаванай злачыннасці асабліва пасуе для дэструктыўнай дзейнасці, такой як аперацыі сабатажу або забойстваў", — цытуе BILD адказ з МУС Германіі.

У цэнтры ўвагі нямецкіх праваахоўнікаў знаходзяцца банды з тэрыторыі былога Савецкага Саюза — так званая "руска-еўразійская арганізаваная злачыннасць". Улады Нямеччыны мяркуюць, што гэтая сетка практычна знаходзіцца пад уплывам Крамля і непасрэдна Уладзіміра Пуціна. Мафіёзныя структуры супрацоўнічаюць з Крамлём, за што ён закрывае вочы на іх крымінальную дзейнасць.

Нямецкі ўрад мае "ўказанні на адпаведныя сувязі таксама і ў Германіі". У дакуменце згадваецца "мноства падазроных выпадкаў магчымых дыверсійных акцый па дзяржаўным заказе Расіі". Пры гэтым апошнія два-тры гады Расія ўсё больш актыўна выкарыстоўвае так званых "аднаразовых агентаў".

Нямецкія органы бяспекі лічаць Расію адказнай за некалькі дыверсій. Улетку 2019 года кілер на заказ Крамля застрэліў у Берліне грузінскага эмігранта. У ліпені 2024-га ў грузавым аэрапорце Лейпцыга загарэлася прылада з запальнай сумессю — мяркуецца, што яна была адпраўленая ў пасылцы па заданні расійскай выведкі. Апошнім выпадкам стаў фішынгавы ўдар па мэсэнджары Signal — мяркуецца, што яго арганізавалі з РФ.