Амбасада Румыніі прыпыніла выдачу віз беларусам
Сцяг Румыніі, ілюстрацыйнае фота / pixabay.com
Каб атрымаць румынскую візу, беларусам цяпер давядзецца ехаць у Маскву. Амбасада Румыніі ў Мінску прыпыніла працу консульскага аддзела, паведамляецца на сайце амбасады. Беларусам прапануюць звяртацца ў консульскі аддзел румынскай амбасады ў Маскве.
Абмежаванні пачалі дзейнічаць з 22 траўня. Амбасада ў Мінску будзе разглядаць толькі экстранныя звароты грамадзян Румыніі па выдачы праязных дакументаў і аказанні консульскай дапамогі ў асаблівых сітуацыях.
У паведамленні не ўдакладняецца, калі плануецца аднавіць працу консульскага аддзела.
Консульскі аддзел румынскай амбасады сёлета ўжо прыпыняў выдачу віз — з 1 лютага. Пазней, з 1 красавіка, выдача віз аднавілася, але толькі для тых, хто паспеў запісацца загадзя. Новыя заяўкі на атрыманне віз тады не прымаліся праз вялікую колькасць зваротаў.
Дарэчы, увечары 23 траўня ў сталіцы Румыніі Бухарэсце адбыўся канцэрт беларускага рэпера Макса Каржа. На яго прыйшло больш за 40 тысяч чалавек.
