У 42 кватэры ў мінскім доме на вуліцы Леніна пасля пажару вярнулі электрычнасць
Мінскі дом, дзе здарыўся пажар / "Мінск-Навіны"
Электрычнасць вярнулі ў 42 кватэры мінскага дома па вуліцы Леніна, дзе здарыўся вялікі пажар, паведамляе дзяржаўнае інфармагенцтва "Мінск-Навіны".
Электрычнасць была адключаная ў сувязі з тым, што дом неабходна прасушыць. Як вынікае з паведамлення, цяпер святло ёсць толькі на першых пяці паверхах, шосты яшчэ знаходзіцца ў стадыі прасушкі. Работы вядуцца паэтапна, іх выконваюць пяць будаўнічых арганізацый.
Цяпер у доме завяршаецца прыборка ўцяпляльніка, старога даху. Рабочыя аднаўляюць цагляны мур, рамантуюць вентыляцыйныя шахты.
Пажар на даху дома ўзнік увечары 28 ліпеня. Агонь ахапіў плошчу больш за 1000 квадратных метраў. Змаганне з ім заняло каля васьмі гадзінаў.
Капітальным рамонтам будынка плануецца заняцца толькі ў 2027 годзе.
