У першым квартале 2026 года з Грузіі выслалі рэкордную колькасць беларусаў
Сцяг Грузіі / pixabay.com
За першы квартал 2026 года грузінскія ўлады выслалі з краіны рэкордную колькасць беларускіх грамадзян — восем чалавек. Пра гэта піша выданне "Позірк", якое прааналізавала звесткі грузінскай паліцыі.
Шасцёра высланых — мужчыны (чатыры — ва ўзросце ад 26 да 40 гадоў, па адным — ад 18 да 25 і ад 41 да 65 гадоў). Таксама былі высланыя дзве жанчыны (па адной ва ўзросце ад 18 да 25 і ад 26 да 40 гадоў).
За ўвесь 2025 год з Грузіі былі высланыя шэсць беларускіх грамадзян, усе — мужчыны. Гэта стала гадавым рэкордам.
За папярэднія шэсць гадоў (з 2019 па 2024-ы) улады Грузіі выслалі толькі трох грамадзян Беларусі (па адным у 2020-м, 2021-м і 2023-м).
У лютым грузінскія ўлады заявілі, што плануюць сёлета выправадзіць з краіны чатыры тысячы замежнікаў-нелегалаў.
