Трамп: Сёння ноччу загіне цэлая цывілізацыя

Прэзідэнт ЗША Дональд Трамп працягнуў пагражаць Ірану ў сваіх пастах у Truth Social.

“Сёння ноччу загіне цэлая цывілізацыя, і яе ўжо ніколі не адродзяць. Я не хачу, каб гэта адбылося, але, верагодна, так і адбудзецца. Аднак цяпер, калі ў нас адбылася поўная і татальная змена рэжыму, калі пераважаюць іншыя, больш разумныя і менш радыкальныя розумы, магчыма, адбудзецца нешта рэвалюцыйна прыгожае, ХТО ВЕДАЕ? Мы даведаемся пра гэта сёння ноччу, у адзін з самых важных момантаў у доўгай і складанай гісторыі свету. 47 гадоў вымагальніцтва, карупцыі і смерці нарэшце скончацца. Няхай Бог благаславіць вялікі народ Ірана!”, — напісаў Дональд Трамп.

7 красавіка заканчваецца тэрмін яго ультыматуму, выстаўленага Ірану. Прэзідэнт ЗША абяцае нанесці ўдары па энергетычнай і транспартнай інфраструктуры Ірана.

У той жа час, паводле інфармацыі іранскага агенцтва Mehr, ЗША і Ізраіль атакавалі іранскі востраў Харк — галоўны вузел нафтавага экспарту краіны, перадае “Радыё Свабода”. Паводле дадзеных крыніц Axios, мэтамі ўдараў па Харку сталі ваенныя аб’екты. Fox News адзначае, што былі атакаваныя бункеры, радыёлакацыйная станцыя і склады боепрыпасаў.

Прэзідэнт ЗША Дональд Трамп раней пагражаў знішчыць нафтавую інфраструктуру вострава, калі Іран не адкрые Армузскі праліў.

Корпус вартавых ісламскай рэвалюцыі заявіў, што "калі амерыканская тэрарыстычная армія пераступіць "чырвоныя лініі", адказ выйдзе за межы рэгіёна".

Выданне Politico піша, што Пентагон пашырае спіс мэтаў для магчымых удараў, уключаючы аб’екты "двайнога прызначэння", якія забяспечваюць рэсурсамі як вайскоўцаў, так і грамадзянскае насельніцтва. Пры гэтым унутры ведамства ідуць спрэчкі аб юрыдычнай абгрунтаванасці такіх атак.

Як заявіла прэс-сакратарка Белага дома Кэралайн Лівіт, Пентагон распрацоўвае варыянты дзеянняў, але гэта не азначае, што канчатковае рашэнне ўжо прынята.

Крыніцы Axios адзначаюць, што Трамп можа ўзяць паўзу ў выпадку прагрэсу на перамовах, але фінальнае рашэнне застаецца за ім. Пры гэтым у Белым доме скептычна ацэньваюць верагоднасць новай адтэрміноўкі.

Раней Трамп неаднаразова выстаўляў Ірану ультыматумы. 5 красавіка ён заявіў, што ў аўторак у краіне будзе "дзень электрастанцый і дзень мастоў адначасова", патрабуючы адкрыць Армузскі праліў. Пазней ён усталяваў новы дэдлайн — аўторак, 7 красавіка, у 20:00 па часе Усходняга ўзбярэжжа.

Праваабаронцы і палітыкі ў ЗША і за іх межамі папярэджваюць, што ўдары па энергетычнай інфраструктуры могуць разглядацца як ваеннае злачынства. Сам Трамп заявіў, што "не турбуецца" з гэтай нагоды і абвінаваціў Іран у парушэннях.