У Брэсце Кастусёў казаў пра маральную перамогу на выбарах

Сёння ў Брэсце сустракаліся з выбарцамі тандэм Кастусёў-Мілінкевіч.  Малая зала прыняла каля двухсот цікаўных. Кандыдат у прэзідэнты ад партыі БНФ Рыгор Кастусёў выразна быў у ценю сваёй даверанай асобы,  адзінага кандыдата ад дэмакратычных сілаў на выбарах-2006. Спадар Мілінкевіч атрымаў шэраг вострых пытанняў. Адно з іх было, чаму ён у 2006 годзе звёў людзей з Плошчы ў горад.  Аляксандр Мілінкевіч: “Важна, што пасля Плошчы такіх пытанняў — маўляў, беларусы што, не хочуць свабоды, не хочуць незалежнасці, бо будуюць саюзную дзяржаву, — такіх пытанняў мне ніхто з палітыкаў за мяжой больш не задаваў".

А яшчэ, сказаў Аляксандр Мілінкевіч, была іншая сітуацыя, і ён меў інфармацыю, што у 2006 годзе улады падрыхтавалі сцэнар са стральбой.

Рыгор Кастусёў прамаўляў па-беларуску. На пытанне, які сэнс у выбарах, калі іх вынік наперад вядомы, спадар Кастусёў адказаў:

— Перамога на выбарах гэта не значыць, што мы падлічым галасы, або галасы будуць падлічаныя на нашу карысць. Ёсць яшчэ маральная перамога, разумееце. Колькасную перамогу можна туды-сюды павярнуць. У нас ёсць самая галоўная перамога, гэта перамога маральная.

Сустрэча доўжылася каля дзвюх гадзінаў.