У ДАІ не лічаць рэгістрацыйны знак аўто персанальнымі данымі
Кіроўца, ілюстрацыйнае фота / sb.by
Рэгістрацыйны аўтамабільны знак не з'яўляецца персанальнымі данымі, таму яго апублікаванне не парушае заканадаўства. Так у ДАІ адказалі на прэтэнзіі Нацыянальнага цэнтра абароны персанальных даных.
Як расказвала Еўрарадыё, прэтэнзіі ўзніклі да інфармацыйнага табло, якое супрацоўнікі ДАІ вывесілі на трасе Р53 Слабада-Навасады. На ім адлюстроўваюцца нумары машын, якія едуць міма, і падаецца інфармацыя пра іх парушэнні. У Нацыянальным цэнтры абароны персанальных даных мяркуюць, што гэта можна ацаніць як разгалошванне персанальных даных
У ДАІ спасылаюцца на пастанову Саўміна №691 ад 28 лістапада 2025 года "Аб дзяржаўнай рэгістрацыі транспартных сродкаў". Там гаворыцца, што рэгістрацыйны знак — выраб, які змяшчае індывідуальнае літарна-лічбавае абазначэнне, якое прысвойваецца транспартнаму сродку, і вырабленае ў адпаведнасці з патрабаваннямі абавязковых для выканання тэхнічных нарматыўных прававых актаў. Рэгістрацыйны нумар патрэбны для ідэнтыфікацыі транспартнага сродку для ўдзелу ў дарожным руху. Таму ў ДАІ лічаць, што гэта не персанальныя даныя і парушэнняў закона няма.
Цікава: ці лічаць у ДАІ нумар пашпарта (індывідуальнае літарна-лічбавае абазначэнне) персанальнымі данымі?
