У кіраўніцтва Опернага тэатра прыйшоў другі экс-міліцыянт
Дзмітрый Кіслы / t.me/bolshoibelarus
Намеснікам гендырэктара Нацыянальнага тэатра оперы і балета Беларусі па ідэалагічнай і сацыяльнай рабоце стаў падпалкоўнік міліцыі Дзмітрый Кіслы. Паведамленне пра яго ў сацсетках тэатра заўважыла выданне "Зеркало".
Калі менавіта ён заняў гэтую пасаду, дакладна не вядома. У сацсетках Опернага Кіслы ўпершыню згадваецца ў лютым 2026 года.
Званне падпалкоўніка міліцыі ён атрымаў у 2011-м, а ў 2014-м узначальваў цэнтр культурна-выхаваўчай работы МУС. Гэта паказала праверка праз бот "Вока змагара", створаны "Кіберпартызанамі".
Кіслы стаў другім сілавіком у кіраўніцтве Вялікага тэатра Беларусі. Раней намеснікам гендырэктара быў прызначаны іншы падпалкоўнік міліцыі — Вадзім Мартысевіч. Менавіта ён у 2025-м спрабаваў арганізаваць паездку балетнай трупы тэатра ў акупаваны Крым.
Такім чынам, цяпер абодва намеснікі гендырэктара Опернага — былыя міліцыянты.
Апошнім часам сілавікі нярэдка займаюць кіруючыя пасады ў беларускіх тэатрах. Так, у красавіку 2026-га дырэктарам Беларускага дзяржаўнага тэатра лялек стаў былы маёр міліцыі, 49-гадовы Вячаслаў Леаненка.
