У новых санкцыях ЕС — Мазырскі НПЗ і новыя абмежаванні на пастаўкі ў Беларусь

Еўрасаюз увёў новыя санкцыі супраць Беларусі. У пастанове Савета ЕС ад 23 ліпеня адзначаецца, што гэтыя абмежаванні былі прынятыя адначасова з 21-м пакетам санкцый супраць Расіі і ўводзяцца за тое, што афіцыйны Мінск падтрымлівае расійскую агрэсію супраць Украіны.

У "чорны спіс" трапіў Мазырскі нафтаперапрацоўчы завод, які амаль цалкам належыць дзяржаве і кампаніі "Слаўнафта", "падтрымлівае рэжым Лукашэнкі і атрымлівае ад яго выгаду". Таксама ў санкцыйны спіс уключылі Еўрапейскую трэйдынгавую кампанію (ЕТК), зарэгістраваную ў Смаленску. Гэта даччыная структура Беларускай нафтавай кампаніі, створаная для продажу прадукцыі беларускіх НПЗ на расійскім рынку.

(Нагадаем, што раней ЕС увёў санкцыі супраць наваполацкага "Нафтана". Такім чынам, цяпер уся беларуская нафтаперапрацоўка трапіла ў "чорны спіс" Еўрасаюза.)

ЕС пашырыў спіс арганізацый, якім забаронена пастаўляць тавары і тэхналогіі падвойнага прызначэння. У прыватнасці, туды былі дададзеныя тры беларускія прадпрыемствы — рагачоўскі завод "Дыяпраектар", канструктарскае бюро "Дысплей" і Завод корпусных вырабаў.

Павялічыўся і спіс прадукцыі, якую забаронена ўвогуле пастаўляць у Беларусь. Пад забарону патрапілі нікелевыя і берыліевыя парашкі, нікель і яго сплавы, асобныя матэрыялы для авіяцыйнай і абароннай прамысловасці, а таксама абсталяванне для беспілотнікаў, уключаючы наземныя станцыі кіравання, сістэмы радыёэлектроннага падаўлення і перахопу, пускавыя ўстаноўкі, серваматоры і сістэмы перапынення палёту. Імпартаваць з Беларусі ЕС забараніў шэраг руд і металаў, неапрацаваны цынк, аксіды цынку і хрому, талавы алей, вырабы са шкла і аўтамабільныя запчасткі.

Пад забарону ЕС з 25 жніўня трапяць парктычна ўсе віды паслуг у сферы крыптаактываў для грамадзян і рэзідэнтаў Беларусі. Выключэнне зроблена для грамадзян краін ЕС, Еўрапейскай эканамічнай зоны і Швейцарыі, а таксама ўладальнікаў часовага або пастаяннага дазволу на жыхарства ў гэтых дзяржавах.